No ano 1984 e coa finalidade de participar nas competicións locais constitúese polos empregados de Garaje Villares S.L., concesionario de Seat en Lugo, un equipo formado polos traballadores da empresa. Con este nome participa nas mesmas ata a tempada 89-90 que se renombra a PRONE ASOCIACIÓN DEPORTIVA e nesta tempada intégranse no equipo, como xogadores, a maioría dos actuais directivos do club.
O equipo dominou claramente as competicións locais e provinciales ata a tempada 96/97 nas que gaña ligas, torneos de copa e gran número de torneos amistosos e de verán.
Na primavera de 1996 tómase unha importante decisión: participar nas competicións nacionais e crear as categorías inferiores e a Escola de fútbol sala de Prone Lugo. Para iso prodúcese unha fusión co club "Cupiga-Parrillada O Ancla" do Barco de Valdeorras, naquel momento descendido de División de Prata, participando o equipo nesta tempada, a 96/97, en 1ª Nacional A, na que co patrocinio de Airtel Grupo Corredoira acaba clasificado en 6ª posición. Na seguinte tempada 97/98 proclámase campión de 1ª Nacional A e consegue o ascenso á División de Prata á vez que gaña por vez primeira a Copa "Xunta de Galicia".
Neste primeiro ano en División de Prata finaliza a fase regular en 3ª posición e está a piques de disputar a promoción de ascenso á División de Honor, obxectivo que consegue na seguinte campaña ao proclamarse campión da categoría e disputar o ascenso ante o F.C. Barcelona, playoff no que sae derrotado, pero como consecuencia da desaparición do Talavera F.S. logra a ansiada participación na División de Honor do fútbol sala nacional por primeira vez na súa historia.
O club conseguira en catro tempadas un obxectivo que se definiu para uns seis ó sete anos. Nestes momentos despregouse unha destacada actividade social e de promoción nos centros educativos de Lugo, para o que se foi dotando progresivamente da necesaria estrutura a todos os niveis, definindo claramente un proxecto deportivo e social para Lugo. Estes aspectos contribuíron e aceleraron o proceso de expansión do noso deporte na cidade e en toda a provincia, situando á marca PRONE como un referente deportivo lucense de primeiro nivel.
Chegaba a decepción de novo cando se descendeu a Prata na tempada 00/01, pero o ansia de superación e o de facer ben as cousas levaron ao ano seguinte (tempada 01/02) ao Café Candelas a División de Honor.
Na tempada 02/03 e xa baixo o patrocinio de Transportes Azkar S.A. os lucenses lograron manter a categoría e finalizaron a tempada en 11ª posición, logrando o título de Campión da Copa Xunta de Galicia e recibindo o premio ao equipo máis deportivo de División de Honor.
Na tempada 03/04 o club tanto a nivel de estrutura como a nivel deportivo dá un paso moi grande. Azkar Lugo leva a cabo unha importante reestructuración da súa organigrama e conta con profesionais en cada unha das áreas. No deportivo o equipo finaliza a tempada en 7ª posición disputando por primeira vez na súa historia os playoffs polo título nos que cae en cuartos de final ante ElPozo Murcia. Ademais o conxunto lucense volvía proclamarse unha vez máis campión da Copa Xunta de Galicia.
Na tempada 04/05 fórmase un equipo ilusionante cheo de xogadores que no seu día foron internacionais e que aportan aínda máis calidade ao equipo. Esta tempada o Azkar Lugo logra clasificarse por primeira vez na súa historia para disputar a Copa de España. O Azkar acudía a este Torneo intentando deixar ao equipo e a unha cidade o máis arriba posible e vaia se o facía xa que logo de eliminar en cuartos de final ao "galáctico" Polaris World Cartagena e en semifinais ao anfitrión MRA Gvtarra Xota plantábase na final da Copa de España "Navarra 05". Na mesma o Azkar perdía por un axustado 4-3 pero caía coa cabeza moi alta tras perder ante o quizais mellor equipo do mundo logrando un meritorio subcampeonato de Copa. En Liga o conxunto lucense finalizaría como 10º clasificado.
Na tempada 05/06 chegaba o título máis importante conseguido ata o momento pola entidade lucense: a Copa de Europa de Clubs Campións de Copa (Recopa de Europa). Do 17 ao 20 de novembro do 2005 viviuse unha auténtica festa do fútbol sala a nivel europeo na nosa cidade. Azkar Lugo representaba a España nun torneo que pese a ser oficioso cada ano que pasa adquire maior importancia. O Azkar non defraudou e tras un gran campionato e vencer na final ao Boavista de Portugal por 4-0 conseguía alzar un título que xa repousa nas vitrinas do club.
A tempada 06/07 foi o ano da Copa de España de fútbol sala en Lugo. A cidade lucense albergou o Torneo do KO onde a cidadanía lucense e galega puido vivir ao longo de toda unha semana o mellor fútbol sala de España. Azkar Lugo como organizador non defraudou e os medios de comunicación especializados de todo o país destacaron a Copa de Lugo como unha das mellores a nivel organizativo.
Para esta tempada 07/08 o Azkar Lugo presenta un novo proxecto. Será unha tempada para enganchar de novo á cidade de Lugo ao noso deporte sempre co apoio das institucións e empresas que día a día demostran o agarimo que teñen ao club de máxima categoría da cidade amurallada.
O Clube
Plantel
